Movieholic Views

591.CITY OF GOD(PORTUGESE,2002)

591.CITY OF GOD(PORTUGESE,2002),|Crime|Drama|,Dir:-Fernando Meirelles, Kátia Lund,*ing:-Alexandre Rodrigues, Matheus Nachtergaele, Leandro Firmino

പട്ടിണിയും ,അത് പോലെ നല്ല വിദ്യാഭ്യാസത്തിന്റെ അഭാവവും മനുഷ്യനെ ചിലപ്പോള്‍ മൃഗ തുല്യന്‍ ആക്കി മാറ്റും.അതും സര്‍ക്കാരിനും ഇതര സമൂഹത്തിനും വേണ്ടാത്ത ആളുകള്‍ തിങ്ങി പാര്‍ക്കുന്ന സ്ഥലം ആകുമ്പോള്‍.”ദൈവത്തിന്റെ പട്ടണം” എന്ന പേരിനു പോലും മാറ്റാന്‍ ആകാത്ത വിധി.അവിടെ ഉള്ളവരും മനുഷ്യര്‍ ആയിരുന്നു.മോഷണം,മയക്കു മരുന്ന് ഉപയോഗം എന്നിവ ആ സമൂഹത്തില്‍ ഇതര സമൂഹങ്ങളില്‍ ഉള്ളതിലും അധികം ബഹുമാനം നേടാന്‍ സഹായിക്കുമായിരുന്നു.പണത്തിനു പകരം കുറ്റകൃത്യം എന്ന നിലപാട് വച്ച് പുലര്‍ത്തുന്ന പോലീസ് കൂടി ആകുമ്പോള്‍ എല്ലാം പൂര്‍ണമായി.

പറഞ്ഞു വരുന്നതു യഥാര്‍ത്ഥ സംഭവങ്ങളെ ആസ്പദം ആക്കി നിര്‍മിച്ച “City of God” എന്ന ബ്രസീലിയന്‍ ചിത്രത്തെ കുറിച്ചാണ്.നേരത്തെ പറഞ്ഞത് പോലെ ഉള്ള സാഹചര്യങ്ങള്‍ അവിടത്തെ ജനങ്ങളുടെ ജീവിതം ദുസ്സഹം ആക്കി.ദിവസം തോറും വളര്‍ന്നു വരുന്ന ഗുണ്ട സംഘങ്ങള്‍ അവിടെ ഭീഷണി ഉയര്‍ത്തി.റോക്കറ്റ് എന്ന ബാലന്‍ അവന്റെ കുട്ടിക്കാലം മുതല്‍ ഉള്ള ആ “പാവപ്പെട്ടവരുടെ നഗരത്തിന്റെ കഥ” അവിടെ നടന്ന പ്രധാന സംഭവങ്ങളിലൂടെ ക്രമമായി പ്രേക്ഷകന് മുന്നില്‍ അവതരിപ്പിക്കുന്നു ഈ ചിത്രത്തില്‍.ചിത്രത്തിലെ കഥപാത്രങ്ങളുടെ വളര്‍ച്ചയുടെ ഓരോ ഘട്ടത്തിലും അവര്‍ കുറ്റ കൃത്യങ്ങളിലേക്കും ജീവിത പഠനം നടക്കുന്നതിലേക്കും, ഉയര്‍ച്ചയും താഴ്ചയും എല്ലാം അവതരിപ്പിക്കുന്നു.ചടുലമായ എഡിറ്റിംഗ് ആണ് ചിത്രത്തിന്റെ പ്രധാന സവിശേഷത.അതിനൊപ്പം യഥാര്‍ത്ഥ ജീവിതം സിനിമ എന്ന മാധ്യമത്തില്‍ കൂടി അല്ലാതെ നേരിട്ട് അനുഭവിച്ചു അറിയാവുന്ന അവസ്ഥ പ്രേക്ഷകന് ചിത്രത്തെ കൂടുതല്‍ ആകര്‍ഷിക്കുന്നു.

അറുപതുകളിലൂടെയും എണ്‍പതുകളിലൂടെയും മുന്നോട്ടു പോകുന്ന കഥയിലെ സ്ഥിര കഥാപാത്രം റോക്കറ്റ് ആയിരുന്നു എങ്കിലും അവന്‍ ആ തെരുവുകളില്‍ ഉള്ളവരുടെ സ്ഥായിയായ സ്വഭാവ സവിശേഷതകളില്‍ നിന്നും വ്യത്യസ്തന്‍ ആയിരുന്നു.ചിത്രത്തിന്റെ അവസാനം അവന്‍ നായക കഥാപാത്രം ആണെന്ന് പ്രേക്ഷകന് തോന്നുന്നുണ്ടെങ്കിലും Lil Z പോലെ ഉള്ള കഥാപാത്രങ്ങള്‍ ആണ് സിനിമയുടെ ശക്തി.നാല് വിഭാഗങ്ങളില്‍ അക്കാദമി പുരസ്ക്കാര നാമനിര്‍ദേശം ലഭിച്ചിരുന്നു ഈ ചിത്രത്തിന്.ടെക്നിക്കല്‍ ആയുള്ള മികവിന് പുറമേ ചടുലമായ കഥയും കൂടി ചേര്‍ന്നപ്പോള്‍ ചിത്രം മികച്ച ചിത്രങ്ങളുടെ കൂട്ടത്തില്‍ ഉള്‍പ്പെട്ടു .

More movie suggestions @www,movieholicviews.blogspot.com

590.MAIN AUR CHARLES(HINDI,2015)

590.MAIN AUR CHARLES(HINDI,2015),|Crime|,Dir:-Prawaal Raman,*ing:-Richa Chadda, Tisca Chopra, Dijana Dejanovic

ചാള്‍സ് ശോഭരാജ്-അപസര്‍പ്പക കഥ പോലെ അവിശ്വസനീയം ആയ ജീവിതം ആയിരുന്നു അയാള്‍ നയിച്ചിരുന്നത്.ചാള്‍സ് ആരായിരുന്നു?ഒരു സീരിയല്‍-കില്ലര്‍?സ്ത്രീകളെ വശീകരിക്കുന്ന ആള്‍ ?കൂര്‍മ ബുദ്ധിയുള്ള മനുഷ്യന്‍ ?അയാള്‍ ബുദ്ധ ഭഗവാനെ പോലെ ആണെന്നും അല്ല ഒരു മാജിക്കുകാരന്‍ ആയിരുന്നു എന്ന് പോലും പലരും അഭിപ്രായപ്പെടുന്നു.സംഭവ ബഹുലമായിരുന്നു ചാള്‍സ് ശോഭാരജിന്റെ കഥ.പല പേരുകളില്‍,പല രാജ്യങ്ങളില്‍.ചെയ്ത കുറ്റ കൃത്യങ്ങളില്‍ നിന്നും വിദഗ്ധമായി അയാള്‍ രക്ഷപ്പെട്ടിരുന്നു.

ചാള്‍സ് ശോഭാരജിന്റെ കോളിളക്കം സൃഷ്ടിച്ച ഒരു ജീവിത അദ്ധ്യായം ആയിരുന്നു ഇന്ത്യയിലെ ജയില്‍ ചാട്ടം.ആ കേസ് അന്വേഷിച്ച പോലീസ് ഉദ്യോഗസ്ഥന്‍ ആയ അമോദ് കാന്തിന്‍റെ കാഴ്ചപ്പാടിലൂടെ ആണ് ചിത്രം വികസിക്കുന്നത്.ആ കുറ്റ കൃത്യത്തില്‍ അയാള്‍ക്ക്‌ വ്യക്തമായ ചില ഉദ്ദേശങ്ങള്‍ ഉണ്ടായിരുന്നു.ഒരു പക്ഷെ കൂര്‍മ ബുദ്ധിയുള്ള ഒരു കുറ്റവാളിക്ക് മാത്രം ചെയ്യാന്‍ കഴിയുന്ന അല്ലെങ്കില്‍ ചിന്തിക്കാന്‍ കഴിയുന്ന പ്രവര്‍ത്തി.അയാള്‍ തന്റെ ചിന്തകള്‍ക്ക് അനുസരിച്ച് മറ്റുള്ളവരുടെ മനസ്സ് പോലും മാറ്റിയിരുന്നു.ശാന്ത സ്വഭാവം കാത്തു സൂക്ഷിക്കുന്ന അയാള്‍ തന്ത്രപൂര്‍വ്വം കുരുക്കിയവരില്‍ നിയമ വിദ്യാര്‍ഥി മുതല്‍ വിദേശി ആയ കുറ്റവാളി പോലും ഉള്‍പ്പെടുന്നു.

ചിത്രം ക്ലൈമാക്സിലേക്ക് അടുക്കുമ്പോള്‍ ചാള്‍സിനെ കുടുക്കി എന്ന് കരുതിയ അമോദ് കാന്ത് എന്നാല്‍ അയാളുടെ യഥാര്‍ത്ഥ ഉദ്ദേശം എന്താണെന്ന് മനസ്സിലാക്കുമ്പോള്‍ ചിത്രം ഒരു നല്ല ത്രില്ലര്‍ ആയി മാറുന്നു.ലേഖനങ്ങളില്‍ കണ്ടിട്ടുള്ള ചാള്‍സിന്റെ രൂപത്തോട് രണ്‍ദീപ് ഹൂട ശരിക്കും നീതി പുലര്‍ത്തി.ഇത്തരം റോളുകള്‍ രണ്‍ദീപിന്റെ കയ്യില്‍ സുരക്ഷിതം ആണ്.മൊത്തത്തില്‍ ആ കഥാപത്രതോട് നീതി പുലര്‍ത്താന്‍ സാധിച്ചു.ഹിപ്പി സംസ്ക്കാരം പ്രസിദ്ധമായിരുന്ന കാലഘട്ടത്തില്‍ എന്നാല്‍ ആ സംസ്ക്കാരം പിന്തുടരാതെ വേറിട്ട്‌ Limelight ല്‍ നിന്നത് തന്നെ ആകാം ചാള്‍സ് ശോഭരാജിനെ മറ്റുള്ളവരില്‍ നിന്നും വ്യത്യസ്തന്‍ ആക്കിയത്.ചിത്രം ഇറങ്ങിയപ്പോള്‍ മികച്ച നിരൂപണങ്ങള്‍ ലഭിച്ചിരുന്നുവെങ്കിലും ബോക്സോഫീസില്‍ ചിത്രം തകര്‍ന്നൂ.നിലവാരം ഉള്ള ഹിന്ദി ചിത്രം തന്നെയാണ് Main Aur Charles.കച്ചവട സാദ്ധ്യതകള്‍ വേണ്ടവിധം ഉപയോഗിക്കാതെ,ഒരു ഡോക്യുമെന്‍ററി പോലും ഇടയ്ക്ക് തോന്നല്‍ ഉണ്ടാക്കിയതും ആകാം ഭൂരിപക്ഷം ജനങ്ങളെ ചിത്രം ആകര്‍ഷിക്കാതെ ഇരുന്നതിനു കാരണം.പക്ഷേ ഒരിക്കലും അവഗണിക്കണ്ട ചിത്രം അല്ല ഇത്.ഇടയ്ക്ക് അല്‍പ്പം ആരാധന ഒക്കെ തോന്നും ചാള്‍സ് ശോഭരാജ് എന്ന കഥാപാത്രത്തോട് .

More movie suggestions @www.movieholicviews,blogspot.com

589.JOY(ENGLISH,2015)

589.JOY(ENGLISH,2015),|Drama|Comedy|,Dir:- David O. Russell,*ing:-Jennifer Lawrence, Robert De Niro, Bradley Cooper.

ഈ വര്‍ഷത്തെ അക്കാദമി പുരസ്ക്കരങ്ങളില്‍ മികച്ച നടിക്കുള്ള നാമനിര്‍ദേശം ജെനിഫര്‍ ലോറന്‍സിനു ലഭിക്കുന്നത് ഈ ചിത്രത്തിലൂടെ ആണ്.Joy ഒരു ഭാഗികമായ ബയോ-എപിക് ചിത്രമാണ്.ജോയ് മംഗാനോ എന്ന സ്ത്രീയുടെ സ്വപ്‌നങ്ങള്‍ പണമായി മാറിയതിന്റെ കഥയാണ് ഈ ചിത്രം അവതരിപ്പിക്കുന്നത്‌.തൊണ്ണൂറുകളില്‍ പുതിയ കച്ചവട തന്ത്രങ്ങളുമായി ടെലിവിഷന്‍ ചാനലുകള്‍ ഇറങ്ങിയപ്പോള്‍ അതിലൂടെ താന്‍ വികസിപ്പിച്ചെടുത്ത Miracle Mop വിറ്റഴിക്കാന്‍ അവര്‍ക്ക് സാധിച്ചു.

ജോയുടെ വഴി എളുപ്പം അല്ലായിരുന്നു.ഭര്‍ത്താവില്‍ നിന്നും വിവാഹ മോചനം നേടിയ,കുട്ടികള്‍ ബാദ്ധ്യത ആയുള്ള ജോയ് എന്നാല്‍ എല്ലാ പ്രതിബന്ധങ്ങളെയും തരണം ചെയ്തത് എങ്ങനെ ആണെന്ന് ചിത്രം അവതരിപ്പിക്കുന്നു,ജോയുടെ മുത്തശി പറഞ്ഞു തരുന്ന രീതിയില്‍ ആണ് കഥ തുടങ്ങുന്നത്.വിവാഹ മോചനം നേടിയ മാതാപിതാക്കള്‍,ടി വിയുടെ മുന്നില്‍ ജീവിതം തീര്‍ക്കുന്ന അമ്മ ,വര്‍ക്ക്ഷോപ്പ്‌ സ്വന്തമായിരുന്ന അച്ഛന്‍,അര്‍ദ്ധ സഹോദരി ആയ പെഗ്ഗി എന്നിവരായിരുന്നു അവളുടെ കുടുംബം.വിവാഹ മോചനം നേടിയെങ്കിലും ഒരു നല്ല സുഹൃത്തായി ഭര്‍ത്താവ് ടോണി അവര്‍ക്ക് കൈതാങ്ങ് ആയി നില്‍ക്കുന്നുണ്ട്.

ഒരു ഫീല്‍ ഗുഡ് മൂവി ആണ് Joy.ഇടയ്ക്ക് ഒരു ഫാനറ്സി പോലെ ചിത്രം തോന്നുമെങ്കിലും ചില രംഗങ്ങള്‍ ചിത്രത്തെ ഒരു നല്ല Inspiration Movie ആക്കി മാറ്റി.ജീവിത തടസ്സങ്ങളെ സ്വയം നേരിട്ട് താന്‍ സ്വപ്നം കണ്ടത്തില്‍,തന്റെ കഴിവിനെ മാത്രം വിശ്വസിച്ച ജോയുടെ കഥയില്‍ ജെനിഫര്‍ ലോറന്‍സ് മികച്ച പ്രകടനം തന്നെ ആണ് കാഴ്ച വച്ചത്.അവര്‍ അര്‍ഹിക്കുന്നു ഈ നാമനിര്‍ദേശം.നന്നായി തന്നെ അവര്‍ ആ കഥാപാത്രത്തെ അവതരിപ്പിച്ചു.

More movie suggestions @www.movieholicviews.blogspot.com

588.LEON:THE PROFESSIONAL(ENGLISH,1994)

588.LEON:THE PROFESSIONAL(ENGLISH,1994),|Crime|Drama|Thriller|,Dir:-Luc Besson,*ing:-Jean Reno, Gary Oldman, Natalie Portman .

ജീവിതത്തില്‍ വ്യക്തമായ ലക്‌ഷ്യം അയാള്‍ക്കുണ്ട് .ഒരു വാടക കൊലയാളി ആയ അയാള്‍ക്ക്‌ താന്‍ ഏറ്റെടുത്ത ജോലി തീര്‍ക്കുക എന്നത് മാത്രമാണ് ജീവിത ലക്‌ഷ്യം.മറ്റൊന്നിലേക്കും ശ്രദ്ധ തിരിക്കാതെ ലോകത്തിലെ മറ്റു കാഴ്ചകളിലേക്ക് ശ്രദ്ധ കൊടുക്കാതെ ജീവിക്കുന്ന അയാളുടെ പേര് ലിയോണ്‍.അക്ഷരാഭ്യാസം ഇല്ലാത്ത,ബന്ധങ്ങള്‍ ഒന്നും ഇല്ലാത്ത അയാള്‍ ഒരു നാടോടിയെ പോലെ ഒരു സ്ഥലത്ത് നിന്നും മറ്റൊരു സ്ഥലത്തേക്ക് അയാളുടെ പ്രിയപ്പെട്ട വളര്‍ത്തു ചെടിയും ആയി മാറി മാറി താമസിക്കുന്നു.ഒരു Apartment ല്‍ താമസിക്കുന്ന ലിയോണ്‍ ഒരിക്കല്‍ അയാളുടെ പരിചിതമായ ജീവിത സാഹചര്യങ്ങളില്‍ നിന്നും മാറി ജീവിതം തുടങ്ങേണ്ടി വരുന്നു.

ഒരു കുടുംബം മൊത്തം ഗൃഹനാഥന്റെ തെറ്റ് കാരണം ശിക്ഷ അനുഭവിക്കണ്ട അവസരത്തില്‍ അയാള്‍ക്ക്‌ ആ വാതില്‍ തുറക്കേണ്ടി വരുന്നു.പന്ത്രണ്ടു വയസ്സുകാരി ആയ ആ പെണ്‍ക്കുട്ടിയുടെ ജീവന്‍ അയാള്‍ ഏറ്റെടുക്കുന്നു.അയാള്‍ ഒരിക്കലും പ്രതീക്ഷിച്ചില്ലെങ്കിലും ഒരിക്കല്‍ തുറന്ന ആ വാതില്‍ അവളുടെ ജീവന്‍റെ സൂക്ഷിപ്പുകാരന്‍ ആയി മാറുവാനും അതോടൊപ്പം അവളുടെ ജീവിതത്തില്‍ പുതുതായി ഉണ്ടായ ലക്ഷ്യത്തിലേക്ക് അവളെ എത്തിച്ചു കൊടുക്കാന്‍ അയാള്‍ നിര്‍ബന്ധിതന്‍ ആകുന്നു,

Leon:The Professional എന്ന ചിത്രത്തിന്റെ കഥ ഇങ്ങനെ അവതരിപ്പിക്കാം.പല ഇന്ത്യന്‍ ഭാഷകളിലും ഈ ചിത്രം പുന:അവതരിക്കപ്പെട്ടിട്ടുണ്ട്.ബിച്ചു,സൂര്യ പാര്‍വൈ തുടങ്ങിയ ചിത്രങ്ങള്‍ ഇതിന്റെ അനൗദ്യോഗിക റീമേക്കുകള്‍ ആയിരുന്നു.ലിയോണും മറ്റില്‍ടയും തമ്മില്‍ ഉള്ള ബന്ധം രണ്ടു പേരുടെയും ജീവിതത്തില്‍ മാറ്റങ്ങള്‍ വരുത്തുന്നുണ്ട്.ജീവിതത്തിനു മുന്‍പ് ഉണ്ടായിരുന്നതിലും വ്യത്യസ്തം ആയ ലക്ഷ്യങ്ങള്‍ നേടി എടുക്കുമ്പോള്‍ അവര്‍ക്ക് നഷ്ടം ആകുന്ന ചിലതും ഉണ്ട്.ഗാരി ഓള്‍ഡ്‌മാന്‍റെ ക്രൂരനായ വില്ലന്‍ വേഷവും എല്ലാം കൂടി ചേരുമ്പോള്‍ നിലവാരം ഉള്ള ഒരു ആക്ഷന്‍ ത്രില്ലര്‍ ചിത്രമായി Leon:The Professional മാറുന്നു.

More movie suggestions @www.movieholicviews.blogspot.com

587.CROUCHING TIGER,HIDDEN DRAGON(MANDARIN,2000)

587.CROUCHING TIGER,HIDDEN DRAGON(MANDARIN,2000),|Action|Drama|,Dir:-Ang Lee,*ing:-Yun-Fat Chow, Michelle Yeoh, Ziyi Zhang .

ഹോളിവുഡ് സിനിമകളുടെ ഇടയില്‍ ഒരു അത്ഭുതം ആയി മാറിയ ഏഷ്യന്‍ ചിത്രം ആയിരുന്നു ആംഗ് ലീയുടെ “Crouching Tiger,Hidden Dragon”.മാര്‍ഷ്യല്‍ ആര്‍ട്സ് പ്രാവീണ്യം ഉള്ള നായക കഥാപാത്രങ്ങള്‍ ആയി വരുന്ന ചിത്രങ്ങളെ ചൈനീസ് ഫിക്ഷന്‍ വിഭാഗമായ Wuxia യില്‍ ഉള്‍പ്പെടുന്ന Crane Iron Pentalogy എന്ന Pentalogy യിലെ നാലാം പുസ്തകം ആണ് ഈ ചിത്രത്തിന് ആധാരം.Wang Dulu ആണ് ഈ പുസ്തകത്തിന്റെ രചയിതാവ്.അമേരിക്കന്‍ സിനിമ ചരിത്രത്തിലെ തന്നെ ഏറ്റവും വലിയ ഹിറ്റ്‌ ആയ ഏഷ്യന്‍ ചിത്രം കൂടിയാണ് ഇത്.

ചൈനീസ് ചരിത്രത്തിലെ Qing രാജവംശത്തിന്റെ കാലത്ത് നടക്കുന്ന കഥയില്‍ ,Wudang എന്ന ആയോധന കലയില്‍ അഗ്രഗണ്യന്‍ ആയ ലി മു ബായി തന്‍റെ ആയോധനകല ജീവിത്തിനു വിരാമം ഇട്ടു മടങ്ങി വരുമ്പോള്‍ അഭിമാന ചിഹ്നം പോലെ ഉപയോഗിച്ചിരുന്ന വാള്‍ ബെയ്ജീങ്ങില്‍ ഉള്ള സര്‍ ടായിക്ക് നല്‍കാന്‍ തീരുമാനിക്കുന്നു.എന്നാല്‍ ആ വാല്‍ മോഷണം പോകുന്നു.അതിനെ ചുറ്റിപ്പറ്റി ഉള്ള കഥയാണ് “Crouching Tiger,Hidden Dragon”.

ചിത്രത്തില്‍ ഉപയോഗിച്ചിരുന്ന മാര്‍ഷ്യല്‍ ആര്‍ട്സ് രംഗങ്ങള്‍ വളരെയധികം ശ്രദ്ധിക്കപ്പെട്ടിരുന്നു.ഗുരുത്വാകര്‍ഷണത്തെ അതി ജീവിക്കുന്ന രീതിയില്‍ ചിട്ടപ്പെടുത്തിയ സംഘട്ടന രംഗങ്ങള്‍ നൃത്തം പോലെ തോന്നി.സംഘട്ടനങ്ങളുടെ കോറിയോഗ്രാഫി മികച്ച നിലവാരം പുലര്‍ത്തി.വ്യത്യസ്തവും ആയിരുന്നു.മാര്‍ഷ്യല്‍ ആര്‍ട്സ് സിനിമകളുടെ സ്ഥിരം ഫോര്‍മാറ്റില്‍ എടുത്ത ചിത്രം ആയിരുന്നെങ്കിലും ചടുലമായ സംഹട്ട്ന രംഗങ്ങളും ആംഗ് ലീയുടെ സംവിധാനവും എല്ലാം കൂടി ചിത്രത്തെ മികവിലേക്ക് ഉയര്‍ത്തി.പത്തു വിഭാഗങ്ങളില്‍ ഓസ്ക്കാര്‍ പുരസ്ക്കാര വേദിയില്‍ നാമനിര്‍ദേശം ലഭിച്ച ചിത്രം മികച്ച വിദേശ സിനിമ ഉള്‍പ്പടെ നാല് പുരസ്ക്കാരങ്ങള്‍ ലഭിച്ചു.Best Cinematography,Music,Art Direction-Set Decoration എന്നീ വിഭാഗങ്ങളില്‍ ആണ് മറ്റു പുരസ്ക്കാരങ്ങള്‍.

More movie suggestions @www.movieholicviews.blogspot.com

586.SEVEN SAMURAI(JAPANESE,1954)

586.SEVEN SAMURAI(JAPANESE,1954),|Action|Drama|,Dir:-Akira Kurosawa,*ing:- Toshirô Mifune, Takashi Shimura, Keiko Tsushima .

“Jidaigeki”,ജാപ്പനീസ് സിനിമയിലെ Period Drama കളെ പൊതുവായി സൂചിപ്പിക്കുന്നത് അങ്ങനെയാണ്.ആ ഗണത്തില്‍ ഉള്‍പ്പെടുത്താവുന്ന ചിത്രം ആണ് വിശ്വപ്രസിദ്ധമായ “Seven Samurai”.ഒരു ഗ്രാമത്തിലെ ജനങ്ങളുടെ അതിജീവനത്തിന്റെ കഥയാണ് ചിത്രം അവതരിപ്പിക്കുന്നത്‌.അകിരാ കുറോസോവയുടെ വിശ്വ വിഖ്യാതം ആയ ഈ സിനിമ 1586 ല്‍ ജപ്പാനിലെ ഒരു കര്‍ഷക ഗ്രാമത്തില്‍ അവരുടെ വിളവെടുപ്പിന്റെ സമയം പതിവായി കൊള്ളയടിക്കാന്‍ വരുന്നവരില്‍ നിന്നും സ്വയം രക്ഷിക്കാന്‍ ആയി വഴി കണ്ടത്താന്‍ ശ്രമിക്കുന്നു.സാമുറായി സംരക്ഷിക്കുന്ന ഗ്രാമങ്ങളില്‍ അതിക്രമങ്ങള്‍ ഉണ്ടാകാറില്ല എന്ന അവരുടെ ചിന്തയാണ് ആ ഗ്രാമം സാമുറായിയെ അന്വേഷിച്ചു ഇറങ്ങാന്‍ പ്രേരിപ്പിക്കുന്നത്.

അന്നത്തെ സാമൂഹിക വ്യവസ്ഥയില്‍ ഒരു സാമുറായിയെ ഉള്‍ക്കൊള്ളാന്‍ അവര്‍ക്ക് കഴിയുന്നില്ല.കാരണം സ്ഥിരം ആയി കൊള്ളയടിക്കപ്പെടുന്ന അവരുടെ കയ്യില്‍ ഒരു സാമുറായിക്ക് നല്‍കാനായി ഉള്ള സമ്പാദ്യം ഒന്നും ഇല്ല.ആകെ ഉള്ളത് അവരെ സംരക്ഷിക്കാന്‍ വരുന്നവര്‍ക്ക് നല്‍കാന്‍ ഉള്ള ഭക്ഷണം ആണ്.ഗ്രാമ തലവന്റെ നിര്‍ദേശപ്രകാരം അവിടെയുണ്ടായിരുന്ന മൂന്നു പേര്‍ “വിശപ്പുള്ള സാമുറായി”യെ കണ്ടെത്താന്‍ ഇറങ്ങി തിരിക്കുന്നു.അവര്‍ പരിചയപ്പെട്ടവര്‍ ആരും തന്നെ “വെറും ” ഭക്ഷണത്തിനായി ആ ഉദ്യമം ഏറ്റെടുക്കാന്‍ തയ്യാറാകുന്നില്ല.എന്നാല്‍ അവസാനം അവര്‍ ഉദ്ദേശിച്ച ആളെ കണ്ടു മുട്ടുന്നു.കമ്പേയി എന്ന ആ സാമുറായി തന്റെ നല്ല പ്രായം കഴിഞ്ഞു തുടങ്ങിയിരുന്നു.എന്നാല്‍ കമ്പേയിയുടെ കയ്യില്‍ വിലമതിക്കാനാകാത്ത ഒന്നുണ്ടായിരുന്നു.പരിചയ സമ്പന്നത.എന്നും തോല്‍വികള്‍ നേരിടേണ്ടി വരുന്ന ഒരു സാമുറായി ആയി സ്വയം വിശേഷിപ്പിക്കുന്ന കമ്പേയി അവര്‍ക്കായുള്ള തന്ത്രങ്ങള്‍ നെയ്യുന്നു.താനടക്കം 7 സാമുറായി കൂടി ഉണ്ടെങ്കില്‍ കൊള്ളക്കാര്‍ക്കു എതിരെ പ്രതിരോധം തീര്‍ക്കാം എന്ന് അയാള്‍ അവരെ അറിയിക്കുന്നു.അവര്‍ ബാക്കി ഉള്ളവരെ കണ്ടെത്താന്‍ ഉള്ള ശ്രമങ്ങള്‍ ആരംഭിക്കുന്നു.അവിടെ നിന്നും ഗ്രാമീണരെ രക്ഷിക്കാന്‍ അവര്‍ തീരുമാനിക്കുന്നത് മുതല്‍ സിനിമയുടെ കഥ ആരംഭിക്കുന്നു.

മൂന്നര മണിക്കൂര്‍ ദൈര്‍ഘ്യം ഉള്ള ഈ ചിത്രം കുറോസോവയുടെ സിനിമ ജീവിതത്തിലെ ഏറ്റവും ദൈര്‍ഘ്യമേറിയ ചിത്രം ആണ്.ഒരു പക്ഷേ ഒരു കൂട്ടം ആളുകള്‍ ഒരു ദൗത്യത്തിനായി ഒരുമിച്ചു കൂടുന്ന പ്രമേയം ആയി വന്ന ചിത്രങ്ങളില്‍ ആദ്യത്തേത് ആയിരുന്നിരിക്കണം ഈ ചിത്രം.Seven Samurai യുടെ ചുവടു പിടിച്ചു ധാരാളം അമേരിക്കന്‍ Western സിനിമകള്‍ ഇറങ്ങിയിരുന്നു.സാമുറായി എന്നുള്ളതിന് പകരം അമേരിക്കന്‍ കൌ ബോയ്‌ കഥാപാത്രങ്ങള്‍ ആയിരുന്നു അവര്‍ വരുത്തിയ പ്രധാന മാറ്റം.”The Magnificent Seven” മുതല്‍ ഉള്ള അമേരിക്കന്‍ ചിത്രങ്ങള്‍ പലതും ഈ രീതി പിന്തുടര്‍ന്നിരുന്നു.പൊതു സമൂഹത്തില്‍ നിന്നും ജനവാസ കേന്ദ്രങ്ങളില്‍ നിന്നും അകന്നു കഴിയുന്ന സാമുറായികള്‍ ഈ ചിത്രത്തില്‍ ഒരു ഗ്രാമത്തിന്റെ മുഴുവന്‍ സംരക്ഷകര്‍ ആകുന്നതിനോടൊപ്പം അപൂര്‍വമായി മാത്രം സംഭവിക്കുന്ന ഒരു മാനസിക ബന്ധം കൂടി ഉണ്ടാക്കി എടുക്കുന്നു.വൈകാരിക തലങ്ങളിലും അത് കൊണ്ട് തന്നെ ചിത്രം മികച്ചു നില്‍ക്കുന്നുണ്ട്.തീര്‍ച്ചയായും കണ്ടിരിക്കണ്ട ചിത്രങ്ങളില്‍ ഒന്ന് തന്നെയാണ് Seven Samurai.

More movie suggestions @www.movieholicviews.blogspot.com

585.GOODFELLAS(ENGLISH,1990)

585.GOODFELLAS(ENGLISH,1990),|Crime|Biography|,Dir:-Martin Scorsese,*ing:-Robert De Niro, Ray Liotta, Joe Pesci.

“ഹെന്‍ട്രി ഹില്‍” കുട്ടിക്കാലം മുതല്‍ ആരാധനയോടെ നോക്കിയിരുന്ന ഒരു ജീവിതം ഉണ്ട്.ഒരു റോഡിനു അപ്പുറം ശക്തിയുടെയും ആദരവിന്റെയും ഭയത്തിന്റെയും ലോകം.നഗരത്തിലെ പ്രധാന കുറ്റകൃത്യങ്ങള്‍ എല്ലാം നിയന്ത്രിക്കുന്ന,പോലീസിന്റെ അടുക്കല്‍ പോകാന്‍ കഴിയാത്ത ആളുകളെ സംരക്ഷിക്കുന്ന ഒരു ലോകം.ഹെന്‍ട്രി അവന്റെ വഴി അവിടെ നിന്നും തിരഞ്ഞെടുക്കുന്നു.സ്ക്കൂള്‍ ഇല്ലാത്ത സമയത്ത് ആ ലോകത്തിന്റെ ചെറിയ ഭാഗം ആകാന്‍ പോയവന്‍ എന്നാല്‍ പിന്നീട് മുഴുവന്‍ സമയവും ആ ലോകത്തിന്റെ ഭാഗം ആയി തീര്‍ന്നൂ.സംഭവ ബഹുലമായ ആ കഥ “Nicholas Pileggi” ,”Wiseguy” എന്ന പേരില്‍ നോവല്‍ ആയി രൂപപ്പെടുത്തി.ആ കഥ “മാര്‍ട്ടിന്‍ സ്കോര്‍സെ” എന്ന സംവിധായകന്‍റെ കയ്യില്‍ ലഭിച്ചപ്പോള്‍ ഒരു പക്ഷെ ഫ്രാന്‍സിസ് ഫോര്‍ഡ് കപ്പോളയുടെ “Godfather” പരമ്പരയ്ക്ക് ശേഷം സിനിമ ലോകം കണ്ട ഏറ്റവും മികച്ച ഗാങ്ങ്സ്ട്ടര്‍ സിനിമകളില്‍ ഒന്നായി മാറുകയായിരുന്നു.

യഥാര്‍ത്ഥ സംഭവങ്ങളെ ആസ്പദം ആക്കി അവതരിപ്പിച്ച ചിത്രം ഇറ്റാലിയന്‍ മാഫിയയുടെ ഭാഗം അല്ലാതിരുന്നിട്ടു കൂടി അവര്‍ക്ക് സമാന്തരമായി വളര്‍ന്ന മൂന്നു പേരുടെ കഥയാണ് അവതരിപ്പിക്കുന്നത്‌.ഹെന്‍ട്രി ഹില്‍ ആരാധനയോടെ നോക്കി കണ്ട ജെയിംസ് കോണ്‍വേയുടെ വിശ്വസ്തന്‍ ആയി അവന്‍ മാറുമ്പോള്‍ അവനും താന്‍ ആഗ്രഹിച്ച രീതിയില്‍ അവന്‍ സ്വപ്നം കണ്ട ജീവിതത്തിലേക്ക് നടന്നു അടുക്കുകയായിരുന്നു.സ്മഗ്ലിംഗ് മുതല്‍ സാമൂഹിക വ്യവസ്ഥയില്‍ കുറ്റ കൃത്യമായി കരുതുന്ന എല്ലാം അവര്‍ ചെയ്തു.എതിരാളികളെ ഈഗോയുടെ പേരില്‍ പോലും കൊന്നൊടുക്കി.പലപ്പോഴും നിസാരകാര്യങ്ങളില്‍ പെട്ടന്ന് ആക്രമസക്തന്‍ ആകുന്ന ടോമി കാരണം പല അനാവശ്യ കൊലപാതകങ്ങളും അവര്‍ ചെയ്യേണ്ടിയും വരുന്നു.

എന്നാല്‍ വര്‍ഷങ്ങള്‍ കഴിയുമ്പോള്‍ ചതിയുടെയും ആക്രമണത്തിന്റെയും ലോകം വലുതാകുന്നതോട് കൂടി അവരുടെ ജീവിതവും മാറി വരുന്നു.ബിസിനസ് ലോകം വ്യാപിക്കുന്നു.പണവും.ആ ഭ്രമിപ്പിക്കുന്ന ലോകത്തില്‍ നിന്നും ഉള്ള അവരുടെ ജീവിതങ്ങളുടെ കഥയാണ് ബാക്കി ചിത്രം അവതരിപ്പിക്കുന്നത്‌.റേ ലിയോറ്റയുടെ അഭിനയ ജീവിതത്തിലെ തന്നെ ഏറ്റവും മികച്ച കഥാപാത്രം ആയിരുന്നു ഈ ചിത്രത്തിലെ ഹെന്‍ട്രി ഹില്‍.6 വിഭാഗങ്ങളില്‍ ഓസ്ക്കാര്‍ നാമനിര്‍ദേശം ലഭിച്ച ചിത്രം എന്നാല്‍ ടോമിയെ അവതരിപ്പിച്ച ജോ പെസ്ക്കീയ്ക്കു ലഭിച്ച മികച്ച സഹ നടന്‍ വിഭാഗത്തില്‍ മാത്രം ആണ് പുരസ്ക്കാരം നേടിയത്.തീര്‍ച്ചയായും കണ്ടിരിക്കണ്ട ചിത്രങ്ങളില്‍ ഒന്ന് തന്നെയാണ് “Goodfellas”.യഥാര്‍ത്ഥത്തില്‍ ജീവിച്ചിരുന്ന ആളുകളുടെ കഥ കൂടി ആകുമ്പോള്‍ കൂടുതല്‍ ഇഷ്ടം ആവുകയും ചെയ്യും ഹെന്‍ട്രി ഹില്‍ തന്റെ സ്വപ്ന ലോകം നേടിയ കഥ .

More movie suggestions @www.movieholicviews.blogspot.com

584.RUN LOLA RUN(GERMAN,1998)

584.RUN LOLA RUN(GERMAN,1988),|Thriller|Crime|,Dir:-Tom Tykwer,*ing:-Franka Potente, Moritz Bleibtreu, Herbert Knaup.

ജീവിതത്തിലെ പ്രശ്നങ്ങള്‍ ഒക്കെ തീര്‍ക്കാന്‍ എന്താണ് വഴി എന്ന് അധികം തല ആലോചിച്ചു പുകയ്ക്കണ്ട ആവശ്യം ഇല്ല.സംഭവിക്കാന്‍ ഒരിക്കലും സാദ്ധ്യത ഇല്ലാത്തതും വെറുതെ ആഗ്രഹിക്കാം എന്നുള്ളതും ആയ ഒരു കാര്യം ആണത്.അതായത് ഒരു “രണ്ടാമൂഴം” (Second chance).ഭാവിയെക്കുറിച്ച് അറിയാന്‍ ഉള്ള ഒരു വഴി ലഭിക്കുമ്പോള്‍ ആ വഴികളിലൂടെ ഉള്ള ഒരു Reverse Mapping മതിയാകും പ്രശ്നങ്ങളെ കണ്ടെത്താനും അവയെ ശരി ആക്കാനും.Butterfly Effect ,Donnie Darko പരമ്പരകള്‍,Sliding Doors,Blind Chance മുതല്‍ പ്രശസ്തവും അപ്രശസ്തവും ആയ ധാരാളം ചിത്രങ്ങള്‍ സിനിമ ലോകത്തിനു സ്വന്തമായി ഉണ്ട്.ഈ അടുത്ത് ഒരു തമിഴ്‌ സിനിമ ആയ “ഇന്ട്രു,നേറ്റ്റൂ നാളയിലും ഒക്കെ Time Travelling ആയിരുന്നെങ്കിലും മുഖ്യ കഥാപാത്രങ്ങള്‍ ഇത്തരം ഒരു അവസ്ഥയെ നേരിടുന്നുണ്ട്.12 B മറ്റൊരു ചിത്രം.

Run Lola Run,ലോലയുടെ കഥയാണ്.ബാങ്കര്‍ അയ പിതാവിന്‍റെ തലതെറിച്ച മകള്‍.കാമുകന്‍ ആയ മാനിയെ സഹായിക്കാന്‍ അവള്‍ക്കു കഴിയും എന്ന് അവര്‍ രണ്ടു പേരും കരുതുന്നു.മാനി അകപ്പെട്ടിരിക്കുന്നത് വലിയൊരു അപകടത്തില്‍ ആണ്.ലോല ഈ അവസ്ഥയില്‍ ഇരുപതു മിനിട്ട് കൊണ്ട് മാനിയുടെ അടുത്തേക്ക് എത്താന്‍ നോക്കുന്നു.അവനെ രക്ഷിക്കാന്‍ ഉള്ള വഴിയും ആയി.എന്നാല്‍ അവളുടെ ആദ്യ ഓട്ടം കഴിയുമ്പോള്‍ അവള്‍ പൂര്‍ത്തി ആകുന്നില്ല എന്ന് അവള്‍ക്കു തന്നെ തോന്നുന്നു.എന്നാല്‍ രണ്ടാം ഓട്ടത്തില്‍ മറ്റൊരാള്‍ക്ക് അതൃപ്തി.മൂന്നാം ഓട്ടത്തില്‍ എന്ത് സംഭവിക്കും??ഇവിടെ കഥാപാത്രങ്ങള്‍ക്ക് പലപ്പോഴും ഓരോ ഓട്ടത്തിലും ലഭിക്കുന്ന ഭാവി ഒക്കെ വ്യത്യസ്ഥം ആണ്.

ലോലയുടെയും മാനിയുടെയും പ്രവര്‍ത്തികള്‍ മാറുന്നിടത്തോളം അവരുടെ ജീവിതവും വ്യത്യസ്തം ആകുന്നു.ഒരു ക്യാമറ ഫ്രെയിമിലൂടെ ചുറ്റും ഉള്ളതിന്റെ ഭാവി അവതരിപ്പിച്ച,ലോലയെ ചിത്രത്തിലെ പശ്ചാത്തല ഗാനത്തിലൂടെ അവളുടെ ഓരോ ചുവടും അവതരിപ്പിച്ചിരുന്നു ഈ ചിത്രത്തില്‍.ഇത് ലോലയുടെ കഥയാണ്.എന്നാല്‍ ആ കഥയില്‍ കഥാപാത്രങ്ങള്‍ വേണം.ആ ആശയം ആണ് മിന്നി മറിഞ്ഞു പോകുന്ന കഥാപാത്രങ്ങള്‍ക്ക് പോലും ഉണ്ടാകുന്ന മാറ്റങ്ങള്‍ ക്യാമറയുടെ ക്ലിക്ക് ശബ്ദങ്ങളിലൂടെ അവതരിപ്പിക്കുന്നതും.തീര്‍ച്ചയായും കണ്ടിരിക്കണ്ട ചിത്രങ്ങളുടെ കൂട്ടത്തില്‍ ഉള്പ്പെടുതണ്ട ചിത്രം തന്നെയാണ് Run Lola Run.

More movie suggestions @www.movieholicviews.blogspot.com

583.WAZIR(HINDI,2016)

583.WAZIR(HINDI,2016),|Action|Crime|Mystery|,Dir:-Bejoy Nambiar,*ing:-Amitabh Bachchan, Farhan Akhtar, Aditi Rao

2016 ലെ ആദ്യ ഹിന്ദി ചിത്രം എന്ന പ്രതീക്ഷയില്‍ നിന്നും അധികമായി സിനിമയിലെ അഭിനേതാക്കളും പ്രതീക്ഷ ഉണര്‍ത്തുന്ന സംവിധായകനും ആയിരുന്നു “വസീര്‍ എന്ന ചിത്രത്തിന്റെ പ്രതീക്ഷകളെ വാനോളം ഉയര്‍ത്തിയത്‌.ചിത്രം ആരംഭിക്കുമ്പോള്‍ മുതല്‍ ആ ഒരു മൂഡ്‌ നില നിര്‍ത്തുന്നുണ്ട് .പ്രത്യേകിച്ചും ആദ്യ സംഭവങ്ങള്‍.പോലീസ് ഉദ്യോഗസ്ഥന്‍ ആയ ഡാനിഷ് അലിയും കുടുംബവും സഞ്ചരിച്ചിരുന്ന കാറിനു നേരെ നടന്ന തീവ്രവാദി ആക്രമണം മുതല്‍ അമിതാഭ് ബച്ചന്റെ പണ്ഡിറ്റ്‌ ഒംകാര്‍ ധര്‍ എന്ന കഥാപാത്രത്തിന്റെ കഥാപാത്ര വികസനത്തില്‍ ഉള്ള രംഗങ്ങള്‍ വരെ.

എന്നാല്‍ തിരക്കഥ എഴുതിയ വിധു വിനോദ് ചോപ്രയ്ക്കും അഭിജത് ജോഷിക്കും രണ്ടാം പകുതിയില്‍ ചിത്രത്തിന്റെ മൊത്തത്തില്‍ ഉള്ള മൂഡ്‌ നിലനിര്‍ത്താന്‍ സാധിച്ചില്ല.പ്രത്യേകിച്ചും കഥ ഒന്നില്‍ മാത്രം ശ്രദ്ധ ചെലുത്താതെ പല വിഷയങ്ങളിലേക്ക് മാറി.ആ രംഗങ്ങളില്‍ ഏതു ഭാഗത്തിന് കൂടുതല്‍ പ്രാധാന്യം കൊടുക്കണം എന്നുള്ള സംശയം ആകാം ഈ ഒരു അവസ്ഥയ്ക്ക് കാരണം.

പിന്നെ ക്ലൈമാക്സ്.ഏറെക്കുറെ ഊഹിക്കാവുന്ന ക്ലൈമാക്സും അതിനു വിശദീകരണം ആയി അവസാന ഭാഗങ്ങളും.ഇത്രയെല്ലാം പറയുമ്പോള്‍ ചിത്രം തീരെ മോശം ആണെന്ന അഭിപ്രായവും ഇല്ല..ഒരു പക്ഷേ നല്ല ഒരു ടീം പ്രവര്‍ത്തിച്ച ഈ സിനിമയെക്കുറിച്ച് ഒരു പ്രേക്ഷകന്‍ എന്നാ നിലയില്‍ ചിന്തിച്ചപ്പോള്‍ പ്രതീക്ഷിച്ച അത്ര വന്നില്ല.എന്നാല്‍ ബച്ചന്‍ സീനിയര്‍,ഫര്‍ഹാന്‍ അക്തര്‍ എന്നിവര്‍ നല്ല പ്രകടനം ആണ് കാഴ്ചവച്ചത്.എന്നാല്‍ നീല്‍ നിതിന്‍ മുകേഷ്,ജോണ്‍ എബ്രഹാം എന്നിവരെ ആവശ്യത്തിനു ഉപയോഗിച്ചില്ല എന്ന പോരായ്മയും ഉണ്ട്.മൊത്തത്തില്‍ തരക്കേടില്ലാത്ത ഒരു ചിത്രം എന്ന് പറയാം എന്നതിലുപരി മികച്ചത് എന്ന് പറയാന്‍ സാധിക്കില്ല എന്നാണ് ഒരു പ്രേക്ഷകന്‍ എന്ന നിലയില്‍ അനുഭവപ്പെട്ടത്

More movie suggestions @www.movieholicviews.blogspot.com

583.BEEBA BOYS(ENGLISH,2015)

583.BEEBA BOYS(ENGLISH,2015),|Action|Crime|,Dir:-Deepa Mehta,*ing:-Randeep Hooda, Ali Momen, Sarah Allen

വിവാദപരമായ വിഷയങ്ങള്‍ തന്റെ സിനിമകളുടെ ഭാഗം ആക്കിയിരുന്ന സംവിധായിക ആയിരുന്നു ദീപ മേത്ത.പ്രമേയപരമായും മികവിന്റെ രൂപത്തിലും ചിത്രങ്ങള്‍ ശ്രദ്ധേയം ആവുകയും ചെയ്തിരുന്നു.ഫിലിം ഫെസ്റ്റിവലുകളില്‍ നിറസാനിദ്ധ്യം ആയിരുന്നു അവരുടെ പല ചിത്രങ്ങളും.`മൂന്നു വര്‍ഷത്തെ ഇടവേളയ്ക്കു ശേഷം ദീപ തിരിച്ചെത്തിയിരിക്കുന്നത് കൂടുതല്‍ വിവാദപരമായ ഒരു പ്രമേയവും ആയാണ്.

കാനഡയിലെ രണ്ടാം തലമുറയില്‍ പെട്ട ഇന്ത്യക്കാര്‍ വാങ്കുവറില്‍ ഒരു വലിയ സമൂഹം ആയി ജീവിക്കുന്നു.സാമ്പത്തികപരമായും സമൂഹത്തിലെ വില അനുസരിച്ചും പലരും ഉയര്‍ന്ന ജീവിത രീതി ആണ് പിന്തുടരുന്നത്.യഥാര്‍ത്ഥ സംഭവങ്ങളെ ആസ്പദം ആക്കി എടുത്ത ഈ ചിത്രത്തില്‍ ജീത് ജോഹര്‍ എന്ന അധോലോക നായകന്‍റെ കഥ ആണ് അവതരിപ്പിക്കുന്നത്‌.ഇന്ത്യക്കാരുടെ രക്ഷകന്‍ ആണ് താനെന്നു സ്വയം വിശ്വസിക്കുന്ന ജീത് താന്‍ വെള്ളക്കാരുടെ ചെയ്തികളില്‍ നിന്നും അവരെ സംരക്ഷിക്കും എന്ന് അവകാശപ്പെടുന്നു.മയക്കുമരുന്നില്‍ തുടങ്ങി ആയുധ കച്ചവടം പോലും നടത്തുന്നു.ഇത്തരം സിനിമകളില്‍ സ്ഥിരം ചേരുവകകള്‍ എല്ലാം തന്നെ ഈ ചിത്രത്തിലും ഉണ്ട്.

എന്നാല്‍ നായകനെ ആവശ്യത്തിലധികം “പുണ്യാളന്‍” ആക്കുന്നും ഇല്ല.ഗ്യാങ്ങുകള്‍ തമ്മില്‍ ഉള്ള പോരാട്ടങ്ങള്‍,കോടതി രംഗങ്ങള്‍,അധോലോക നായകനില്‍ അനുരക്ത ആകുന്ന നായിക,ചതി,വിശ്വാസ വഞ്ചന,കൊലപാതകങ്ങള്‍ എല്ലാം അധോലോക ചിത്രങ്ങളുടെ സ്ഥിരം ഫോര്‍മാറ്റില്‍ തന്നെ അവതരിപ്പിച്ചിട്ടും ഉണ്ട്.പല രംഗങ്ങളും സ്റ്റൈലിഷ് ആയിരുന്നു താന്,പ്രത്യേകിച്ചും പഞ്ചാബി റോക്ക് ഒക്കെ പശ്ചാത്തലം ആയി വരുമ്പോള്‍.എന്നാല്‍ ചിത്രത്തില്‍ എവിടെയോ എന്തൊക്കെയോ പാകപ്പിഴവ് വന്നത് പോലെ.തിരക്കഥയില്‍ കുറച്ചും കൂടി ശ്രദ്ധിക്കാമായിരുന്നു.കഥ പ്രവചിക്കാവുന്ന രീതിയില്‍ ആയിരുന്നു അവതരിപ്പിച്ചിരുന്നത് എന്നതൊക്കെ പോരായ്മ ആയി തോന്നി.പ്രത്യേകിച്ചും അതിനായുള്ള ഒരു പ്ലോട്ട് നിര്‍മിച്ചതിന് ശേഷം.പിന്നെ വെള്ളക്കാരെ മോശം ആയി കാണിക്കുന്ന രംഗങ്ങള്‍ ഉള്ളത് കൊണ്ട് അവര്‍ക്കും ചിത്രം അത്ര പഥ്യം ആയി തോന്നിയില്ല.മോശം റേറ്റിംഗ് ഒക്കെ അതിന്റെ കൂടി ഭാഗം ആകാം.സ്ഥിരം ഇന്‍ഡോ-കനേഡിയന്‍ ചിത്രങ്ങളുടെ വിധി തന്നെയായിരുന്നു ഈ ചിത്രത്തിനും.

More movie suggestions @www.movieholicviews.blogspot.com

582.QISSA:THE TALE OF A LONELY GHOST(PUNJABI,2013)

582.QISSA:THE TALE OF A LONELY GHOST(PUNJABI,2013),|Fantasy|Drama|,Dir:-Anup Singh,*ing:-Madhuja Mukherjee, Anup Singh.

സ്വാതന്ത്ര്യാനന്തര ഭാരത്തിനു ഉണ്ടായ ഏറ്റവും വലിയ മുറിവായിരൂനു മതത്തിന്റെ പേരില്‍ രാജ്യം രണ്ടായി വിഭജിക്കപ്പെട്ടത്.വിഭജനത്തില്‍ പാക്കിസ്ഥാന്‍റെ സ്വന്തമായി മാറിയ പഞ്ചാബിലെ ഭാഗത്ത്‌ ഉണ്ടായ സംഘര്‍ഷങ്ങള്‍ അംബര്‍ സിങ്ങിന്റെയും കുടുംബത്തിന്റെയും പാലായനത്തിനു വഴി തെളിച്ചു.സിഖുകാര്‍ അടങ്ങിയ ആ ഗ്രാമം മൊത്തം അവിടെ നിന്നും ശത്രുക്കളെ തുരത്തിയെങ്കിലും പാലായനം ചെയ്തു.അവിടത്തെ ഗ്രാമവാസികളെ ആക്രമിക്കാന്‍ വന്ന അവസാന പാക്കിസ്ഥാനിയെയും കൊന്ന് “കിണറ്റിലെ വെള്ളത്തിലെ വിഷം” ആക്കി കഴിഞ്ഞാണ് അംബര്‍ സിംഗ് അവിടെ നിന്നും പോകുന്നത്.

ഇത് വരെ ഉള്ളത് യാതാര്‍ത്ഥ്യം.എന്നാല്‍ ഭാര്യ മൂന്നാമതും അയാള്‍ക്ക്‌ പെണ്‍കുട്ടിയെ നല്‍കിയപ്പോള്‍ അടുത്തത് ആണ്‍ക്കുട്ടി ആയിരിക്കും എന്ന് അയാള്‍ ഉറപ്പു പറയുന്നു.ഭാര്യയുടെ പ്രവചനം പോലെ തന്നെ നാലാമതും പെണ്‍കുട്ടി ആണ് ഉണ്ടായതു.എന്നാല്‍ ആ ചിന്ത അംബര്‍ സിംഗിന്റെ മനസ്സ് മാറ്റി.പാലായനം ചെയ്തെങ്കിലും സ്വന്തം ജീവിതം കെട്ടിയുയര്‍ത്തിയ അയാള്‍ എന്നാല്‍ തനിക്കൊരു പിന്ഗാമി ഇല്ല എന്നുള്ള ചിന്തയില്‍ ചെയ്തത് ഒരു ക്രൂരത ആണ്.നാലാമത്തെ മകള്‍ക്ക് കണ്‍വര്‍ എന്ന് പേരിട്ട അയാള്‍ അവളെ ആണ്‍ക്കുട്ടി ആയി വളര്‍ത്തി.ആണ്‍ക്കുട്ടികളുടെ വസ്ത്രധാരണവും പെരുമാറ്റങ്ങളും എല്ലാം.

ആദ്യ രണ്ടു ഭാഗത്തും അവതരിപ്പിച്ചിരിക്കുന്ന കഥ ഒരു തലമുറ മുഴുവന്‍ പെണ്‍കുട്ടി എന്ന് പറഞ്ഞാല്‍ കുടുംബത്തിനു ഒരു ഭാരം ആണെന്ന് കരുതിയ ചിന്തകളില്‍ നിന്നും ഉരുത്തിരിഞ്ഞതാണ്.അംബര്‍ സിംഗും അങ്ങനെ തന്നെ ചെയ്തു.എന്നാല്‍ അയാള്‍ അതിനെ അയാളുടെ ഭ്രാന്തന്‍ ചിന്തകളും ആയി നേരിട്ടു എന്ന് മാത്രം,എന്നാല്‍ ചിത്രത്തിന്റെ മൂന്നാം ഭാഗം എന്ന് പറയുന്ന സ്ഥലം കൂടുതല്‍ സങ്കീര്‍ണം ആകുന്നു.ആദ്യ രണ്ടു ഭാഗം മൂലം ഉണ്ടാകുന്ന അവിശ്വസനീയം ആയ ഒരു മാനസികാവസ്ഥ.അത് ചിത്രത്തിലെ എല്ലാ കഥാപാത്രങ്ങളെയും ബാധിക്കുന്നുണ്ട് എന്നത് സത്യം.സ്വന്തം വ്യക്തിത്വം പോലും മറന്ന ജന്മങ്ങളായി അവര്‍ മാറുന്നു.2013 ലെ Toronto International Film Festival ല്‍ Netpac Award ഈ ചിത്രം നേടിയിരുന്നു.ഒപ്പം നിരൂപക പ്രശംസയും..

More movie suggestions @www.movieholicviews.blogspot.com

581.THE MATRIX(ENGLISH,1999)

581.THE MATRIX(ENGLISH,1999),|Sci-Fi|Action|,Dir:-Andy Wachowski, Lana Wachowski,*ing:-Keanu Reeves, Laurence Fishburne, Carrie-Anne Moss

“The Matrix” എന്ന സിനിമയുടെ പേര് കേള്‍ക്കുമ്പോള്‍ തന്നെ ആദ്യം തന്നെ മനസ്സില്‍ വരുന്നത് അതിലെ ആക്ഷന്‍ സീനുകള്‍ ആകും.വെടിയുണ്ടകള്‍ ഒക്കെ വരുമ്പോള്‍ സ്ലോ മോഷനില്‍ ഒഴിഞ്ഞു കൊടുക്കുന്ന കഥാപാത്രങ്ങള്‍ ഒക്കെ സാധാരണ ഒരു ചിത്രത്തില്‍ ആയിരുന്നെങ്കില്‍ തികച്ചും അരോചകം തന്നെ ആയേനെ.എന്നാല്‍ “വാചോസ്ക്കി സഹോദരങ്ങള്‍” സംവിധാനം ചെയ്ത ഈ കീനു റീവ്സ് ചിത്രം അതിന്‍റെ കഥാഘടന കൊണ്ട് തന്നെ ആ രംഗങ്ങളെ അവിസ്മരണീയമായ അനുഭവം ആക്കി മാറ്റി.സയന്‍സ് ഫിക്ഷന്‍ ചിത്രം ആയ “ദി മാട്രിക്സ്” പറയുന്ന കഥ നമ്മള്‍ ഉണ്ടെന്നു കരുതുന്ന ലോകം വെറും മായ ആണെന്നും.ഒരു പ്രത്യേക രീതിയില്‍ പ്രോഗ്രാം ചെയ്ത ഒരു System ആണ് Virtual Reality എന്ന് വിശേഷിപ്പിക്കാവുന്ന ലോകത്തില്‍ ഉള്ളതും എന്നാണു.

പ്രോഗ്രാമര്‍ ആയ നിയോ ഒരു ഹാക്കര്‍ കൂടി ആണ്.Matrix എന്ന വാക്ക് അയാളുടെ ശ്രദ്ധയില്‍ ആവര്‍ത്തിച്ച് വരുകയും അതിനെ കുറിച്ചുള്ള അന്വേഷണം അയാളെ കൊണ്ടെത്തിക്കുന്നത് മോര്‍ഫിയാസ് എന്ന കലാപകാരിയുടെ അടുക്കലും ആണ്.ലോകത്തെ കുറിച്ചുള്ള സത്യം അയാള്‍ നിയോയെ ബോധിപ്പിക്കുന്നു.ഒരു ചുവന്ന ഗുളിക കഴിക്കുന്ന നിയോ പിന്നീട് അറിയുന്നതും കാണുന്നതും ആയ ലോകവും അവിടത്തെ അയാളുടെ ശത്രുക്കളെയും മിത്രങ്ങളെയും ആണ് ബാക്കി ചിത്രം അവതരിപ്പിക്കുന്നത്‌.ജാപ്പനീസ് ആയോധന കലയുടെ രീതിയില്‍ അവതരിപ്പിച്ച സംഘട്ടനങ്ങള്‍ ആക്ഷന്‍ രംഗങ്ങള്‍ക്ക് ഒരു Benchmark ആയി മാറി എന്നും പറയാം.

മാട്രിക്സ് എന്ന മായാവലയത്തില്‍ അകപ്പെട്ടു പോയവരും അതില്‍ നിന്നും രക്ഷപ്പെടാന്‍ ഉള്ള ശ്രമങ്ങളും പിന്നീട് ഈ ചിത്രത്തിന്റെ അടുത്ത രണ്ടു ഭാഗങ്ങള്‍ ആയി വന്നിട്ടുണ്ട്. The Matrix Reloaded ,The Matrix Revolutions എന്നിവയായിരുന്നു ഫ്രാഞ്ചൈസിയുടെ അടുത്ത രണ്ടു ചിത്രങ്ങള്‍.ഓസ്ക്കാര്‍ പുരസ്ക്കാര വേദിയില്‍ നാല് വിഭാഗത്തില്‍ ചിത്രം പുരസ്ക്കാരം നേടിയിരുന്നു.ചിത്രത്തിന്റെ മികവിന് കാരണമായ സാങ്കേതിക വിഭാഗത്തില്‍ ആയിരുന്നു നാല് നാമനിര്‍ദേശങ്ങള്‍ നേടിയതും അത് മുഴുവനും അവാര്‍ഡ് ആയി ലഭിച്ചതും.Best Film Editing,Best Sound,Best Effects/Sound Effects Editing,Best Effects/ Sound Effects Editing എന്നീ വിഭാഗത്തില്‍ ആയിരുന്നു പുരസ്ക്കാരങ്ങള്‍.ലോകത്തിലെ തന്നെ മികച്ച സയന്‍സ് ഫിക്ഷന്‍ സിനിമകളുടെ കൂട്ടത്തില്‍ ആണ് “The Matrix” ന്‍റെ സ്ഥാനം.

More movie suggestions @www.movieholicviews.blogspot.com