Movieholic Views

568.UNFINISHED BUSINESS(ENGLISH,2015),|Comedy|,Dir:- Ken Scott,*ing:-Vince Vaughn, Dave Franco, Tom Wilkinson.

വളരെയധികം നെഗറ്റീവ് റിവ്യൂ വരുകയും ബോക്സോഫീസ് ദുരിതം ആയി മാറുകയും ചെയ്ത ചിത്രം ആണ് “Unfinished Business”.വിന്‍സ് വോഗന്റെ കോമഡി സിനിമകള്‍ വെറുതെ  കണ്ടിരിക്കാന്‍ രസമുള്ളത് കൊണ്ട് ഒരു ചിത്രവും കാണാതെ വിടുകയും ഇല്ല.എന്നാല്‍ ഈ ചിത്രം വിന്‍സ് വോഗന്റെ സിനിമ ജീവിതത്തിലെ ഏറ്റവും വലിയ ദുരിതം  ആയി മാറുകയാണ് ഉണ്ടായത് ബോക്സോഫീസില്‍.പ്രേക്ഷകര്‍ സിനിമയെ സ്വീകരിച്ചില്ല എന്ന് തന്നെ പറയാം..

ഡാന്‍ താന്‍ ജോലി ചെയ്യുന്ന കമ്പനിയില്‍ സെയില്‍സ് വിഭാഗത്തില്‍ ആയിരുന്നു ജോലി ചെയ്തിരുന്നത്.എന്നാല്‍ ഡാനിന്റെ ശമ്പളം കുറയ്ക്കാന്‍ മാനേജര്‍ ആയ ചക് ശ്രമിക്കുമ്പോള്‍ അവിടെ നിന്നും അയാള്‍ ഇറങ്ങുന്നു.പുതുതായി ഒരു കമ്പനി നിര്‍മിക്കാം എന്ന പ്രതീക്ഷയില്‍.-അവിചാരിതം ആയി കൂടെ കൂടിയത് തിമോത്തി എന്ന 67 വയസ്സുകാരനും അവിടെ അന്ന് ഇന്റര്‍വ്യൂവിനു വന്ന മൈക്കും ആയിരുന്നു.ഡാന്‍  അവരെ ഒപ്പം കൂട്ടുന്നു.എന്നാല്‍ ഒരു വര്‍ഷത്തിനു അപ്പുറവും അവരുടെ പുതിയ കമ്പനി ആയ അപെക്സ് രക്ഷപ്പെടുന്നില്ല.അവസാന പിടിവള്ളി പോലെ ഡാന്‍ ഒരു പ്രോജക്റ്റ് നേടി എടുക്കാന്‍ ശ്രമിക്കുന്നു.സ്വന്തം ഓഫീസ് പോലും ഇല്ലാത്ത അവര്‍ പ്രതീക്ഷയോടെ ഡീല്‍ ഉറപ്പിക്കാന്‍ ബിസിനസ് ട്രിപ്പ്‌ പ്ലാന്‍ ചെയ്യുന്നു.എന്നാല്‍ പ്രതീക്ഷിച്ച പോലെ എളുപ്പം അല്ലായിരുന്നു കാര്യങ്ങള്‍.കാരണം ഡാനിന്റെ എതിരാളി ആയി ഉള്ളത്  പഴയ മാനേജര്‍ ചക്ക് ആയിരുന്നു.അവരുടെ ബിസിനസ് ട്രിപ്പ്‌ അവരുടെ മൂന്നു പേരുടെയും ജീവിതത്തില്‍ മറക്കാന്‍ കഴിയാത്ത ഒന്നായി മാറുന്നു.ആ കഥയാണ് ബാക്കി ചിത്രം അവതരിപ്പിക്കുന്നത്‌.

   എന്നാല്‍ സിനിമ കണ്ടു തീര്‍ന്നപ്പോള്‍ മനസിലായത് സ്ഥിരം ഫോര്‍മാറ്റില്‍ എടുത്ത ഒരു ഫീല്‍ ഗുഡ് മൂവി ആക്കാന്‍ ആണ് ശ്രമിച്ചത്‌ എന്നായിരുന്നു.പതിവ് പോലെ പ്രവചനാതീതം ആയ ക്ലൈമാക്സും എല്ലാം ആയിരുന്നെങ്കിലും ഒരു പ്രാവശ്യം കാണുന്നതില്‍ തെറ്റില്‍ എന്ന് തോന്നി ചിത്രം.ഒരു പക്ഷെ ഇത് പോലത്തെ സിനിമകള്‍ ഇഷ്ടം ഉള്ളത് കൊണ്ടാകാം എനിക്ക് ഈ ചിത്രം ഇഷ്ടപ്പെട്ടത്.പക്ഷെ നിര്‍ബന്ധമായും കാണേണ്ട ചിത്രങ്ങളില്‍ ഒന്നായി “Unfinished Business” മാറുന്നില്ല എന്നാണു തോന്നുന്നത്.

More movie suggestions @www.movieholicviews.blogspot.com

566.ANCHORMAN 2:THE LEGEND CONTINUES(ENGLISH,2013),|Comedy|,Dir:-Adam McKay,*ing:-Will Ferrell, Adam McKay,Christina Applegate<paul Rudd,Steve Carell,David Koechner.

2004 ല്‍ ഇറങ്ങിയ Direct-to-Video ചിത്രം ആയാണ് ആദ്യ ഭാഗത്തിലെ ചില സംഭവങ്ങളെ ഒക്കെ കോര്‍ത്ത്‌ ഇണക്കി  ” Wake Up, Ron Burgundy: The Lost Movie” ഇറങ്ങുന്നത്.അതിനു ശേഷം ചിത്രത്തിന്‍റെ രണ്ടാം ഭാഗം ആയി തിയറ്ററില്‍ റിലീസ് ആകുന്ന ചിത്രം ആണ് “ANCHORMAN 2:THE LEGEND CONTINUES”.ആദ്യ ചിത്രത്തിലെ കഥാപാത്രങ്ങള്‍ തന്നെ രണ്ടാം ഭാഗത്തിലും അവരവരുടെ വേഷങ്ങള്‍ അവതരിപ്പിച്ചു.ഡിസ്ട്രിബ്യൂഷന്‍ Paramount Picture,DreamWorks Pictures ല്‍ നിന്നും നേടിയെടുത്തത് മാറ്റി നിര്‍ത്തിയാല്‍ ആദ്യ ഭാഗതിന്റെ അതെ രീതിയിലും അതെ ടീമും ആണ് ഈ ചിത്രത്തിലും ഉള്ളത്.അപ്രതീക്ഷിതം ആയി സ്ക്രീനില്‍ വരുന്ന പരിചിത മുഖങ്ങള്‍ ടി വി ചാനലുകാര്‍ തമ്മില്‍ സംഘര്‍ഷം ഉണ്ടാകുന്ന ഭാഗത്തിലും അവതരിപ്പിക്കുന്നുണ്ട്.

  ആദ്യ സിനിമയുടെ കഥാഘടന ആണ് ഈ ചിത്രത്തിനും ഉള്ളത്.റോണ്‍ ബര്‍ഗണ്ടിയും കൂട്ടരും അവരുടെ ജീവിതത്തിലെ മോശം സമയത്ത് വീണ്ടും ഒന്നിക്കുകയാണ്.അമേരിക്കയിലെ ആദ്യ 24 മണിക്കൂര്‍ ടെലിവിഷന്‍ ചാനലിനു വേണ്ടി.GNN എന്ന സാങ്കല്‍പ്പിക ടെലിവിഷന്‍ ചാനലിലെ അര്‍ദ്ധരാത്രിയിലെ വാര്‍ത്തകള്‍ക്ക് വേണ്ടി ആണ് ഈ ടീം വീണ്ടും ഒരുമിക്കുന്നത്.കാലഘട്ടം മാറിയിരുന്നു.സാന്‍ ദിയാഗോയില്‍ നിന്നും ന്യൂ യോര്‍ക്കില്‍ എത്തിയ അവരെ കാത്തിരുന്നത് പ്രൈം ടൈമില്‍ വാര്‍ത്ത വായിക്കുന്ന പുതിയ തരംഗം ആയിരുന്ന ജാക്ക് ലൈമും കൂട്ടരും ആയിരുന്നു.ഒരു ബെറ്റില്‍ ജാക്കും ലൈമും ഏര്‍പ്പെടുന്നു.റേറ്റിംഗ് ആര്‍ക്കു കൂടുന്നു എന്നതില്‍ ആയിരുന്നു അവരുടെ മത്സരം.

   എന്നാല്‍ റോണ്‍ ബര്‍ഗണ്ടി വീണ്ടും ടെലിവിഷനില്‍ പുതുമകള്‍ അവതരിപ്പിക്കാന്‍ ഉറപ്പിച്ചു തന്നെ ആയിരുന്നു.എല്ലാവരും ഉറങ്ങുന്ന സമയത്ത് വാര്‍ത്ത അവതരിപ്പിക്കുമ്പോള്‍ അതില്‍ പുതുമ വേണം എന്ന് റോണ്‍ മനസ്സിലാക്കുന്നു.അയാള്‍ തന്‍റെ പുതിയ രീതി അവതരിപ്പിക്കുന്നു.റോണ്‍ ബര്‍ഗണ്ടിയുടെയും കൂട്ടരുടെയും യാത്ര വീണ്ടും തുടരുന്നു.ഇത്തവണ റോണ്‍ ബര്‍ഗണ്ടിക്ക് കുറച്ചു കൂടി ഉത്തരവാദിത്തം ഉണ്ട് ജീവിതത്തില്‍.ജീവിതവും വാര്‍ത്തയും അതിലെ മാന്യതയും റൊണിന് കാത്തു സൂക്ഷിച്ചേ മതിയാകൂ.ആദ്യ ഭാഗം പോലെ തന്നെ തമാശകളും ഒക്കെ ആയി പോകുന്നു രണ്ടാം ഭാഗവും.ആദ്യ ഭാഗം ഇഷ്ടപ്പെട്ടവര്‍ക്ക് ഈ ഭാഗം ഇഷ്ടപ്പെടാതെ ഇരിക്കാന്‍ പ്രത്യേകിച്ച് കാരണം ഒന്നും ഇല്ല എന്ന് കരുതുന്നു.

More movie suggestions @www.movieholicviews.blogspot.com

565.ANCHORMAN:THE LEGEND OF RON BURGUNDY(ENGLISH,2004),|Comedy|,Dir:-Adam McKay,*ing:-Will Ferrell, Adam McKay,Christina Applegate<paul Rudd,Steve Carell,David Koechner

   ജൂഡ് അപ്പടോയുടെയും  കൂട്ടരുടെയും മറ്റൊരു കോമഡി വിജയ ചിത്രം ആണ് “ANCHORMAN:THE LEGEND OF RON BURGUNDY”.സ്ഥിരം കൂട്ടുക്കെട്ടും പിന്നീട് ചിത്രത്തില്‍ വരുന്ന അപ്രതീക്ഷിത പരിചിത മുഖങ്ങള്‍ എല്ലാം കൂടി ചേര്‍ന്ന ഒരു കോമഡി ചിത്രം ആണ് എഴുപതുകളില്‍ നടക്കുന്ന കഥയായി അവതരിപ്പിച്ചിരിക്കുന്നത്.ടെലിവിഷന്‍ ചാനലുകളുടെ ചരിത്രത്തില്‍ ഉണ്ടായ മാറ്റങ്ങള്‍ അമേരിക്കന്‍ രീതിയിലൂടെ ഫിക്ഷന്‍ -കോമഡി ആയാണ് ചിത്രത്തില്‍ അവതരിപ്പിച്ചിരിക്കുന്നത്.വില്‍ ഫെരല്‍ ആണ് മുഖ്യ കഥാപാത്രം ആയ റോണ്‍ ബര്‍ഗണ്ടിയെ അവതരിപ്പിക്കുന്നത്‌.

    KVWN channel 4 എന്ന സാങ്കല്‍പ്പിക ടെലിവിഷന്‍ ചാനലിലെ മുഖ്യ വാര്‍ത്ത അവതാരകന്‍ ആണ് റോണ്‍.സാന്‍ ദിയഗോയില്‍ നിന്നും പ്രക്ഷേപണം ചെയ്യുന്ന ചാനലില്‍ വാര്‍ത്ത അവതരിപ്പിക്കുന്ന റോണ്‍ ആ കൊച്ചു നഗരത്തില്‍ ഇതിഹാസ തുല്യമായ പരിവേഷം ആയിരുന്നു.ആരാധകര്‍ റോണിന്റെ വാര്‍ത്തകള്‍ക്കായി കാത്തിരിക്കുന്നു.ആ കൊച്ചു നഗരത്തിന്റെ വികാരം ആയിരുന്നു റോണ്‍.റോണിന്റെ വാര്‍ത്തകളുടെ ടീം ആയിരുന്നു ബ്രയാന്‍,ബ്രിക്ക്,ചാമ്പ് എന്നിവര്‍. അവരുടെ വിജയങ്ങള്‍ അവര്‍ ആഘോഷിച്ചു.ടെലിവിഷന്‍ ചാനലുകളുടെ തുടക്ക സമയം സ്ത്രീ അവതാരകര്‍ ആരും ഇല്ലായിരുന്നു.എന്നാല്‍ അവസാനം അതും സംഭവിച്ചു.വെറോണിക്ക എന്ന സ്ത്രീ പുരുഷ മേധാവിത്വം ഉള്ള ആ രംഗത്തേക്ക് വരുന്നു.

  റോണും കൂട്ടരും അവരുടെ വരവിനെ സ്വീകരിക്കുന്നില്ല.എന്നാല്‍ വെറോണിക്കയ്ക്ക് തന്‍റെ പ്രവര്‍ത്തികളെ കുറിച്ച് വ്യക്തമായ കാഴ്ചപ്പാട് ഉണ്ടായിരുന്നു.അവള്‍ അതനുസരിച്ച് പ്രവര്‍ത്തിക്കാന്‍ ആരംഭിച്ചു.എന്നാല്‍ അവളുടെ മാര്‍ഗം എളുപ്പം അല്ലായിരുന്നു.എന്നാല്‍ അവള്‍ റോണിന്റെ മനസ്സില്‍ കടന്നു കൂടുന്നു.അവരുടെ ബന്ധം കൂടുതല്‍ കുഴപ്പങ്ങളിലേക്ക് പോകുന്നു.അമേരിക്കന്‍ Adult-Comedy യുടെ ചേരുവകകള്‍ ഒക്കെ ചേര്‍ത്ത രസകരമായ മറ്റൊരു ചിത്രം ആണ് “ANCHORMAN:THE LEGEND OF RON BURGUNDY”.വളരെയധികം റിലാക്സ് ചെയ്തു കാണാവുന്ന മറ്റൊരു ചിത്രം.

More movie suggestions @www.movieholicviews.blogspot.com

564.THE 40 YEAR OLD VIRGIN(ENGLISH,2005),|Comedy|,Dir:-Judd Apatow,*ing:-Steve Carell, Catherine Keener, Paul Rudd.

   ഹോളിവുഡ് സിനിമകളിലെ പല തമാശ ചിത്രങ്ങളിലും കാണുന്ന പേരാണ് ജൂഡ് അപാടോ.സംവിധായകന്‍ ആയും നിര്‍മാതാവ് ആയും കഥ എഴുത്തുകാരന്‍ ആയും  ഒക്കെ വരുന്ന ജൂഡിന്റെ ചിത്രങ്ങളിലെ സ്ഥിരം സാനിദ്ധ്യങ്ങള്‍ ആണ് സ്റ്റീവ് കാരല്‍,റോജര്‍ സേത്ത്,പോള്‍ റഡ,വില്‍ ഫാരല്‍,ജോനാ ഹില്‍  തുടങ്ങി കുറെ മുഖങ്ങള്‍.പല ചിത്രങ്ങളിലും ഇവര്‍ ഒരു ടീം ആയി ചെറിയ വേഷങ്ങളില്‍ കൂടി ആണെങ്കിലും ചിത്രങ്ങളില്‍ മുഖം കാണിക്കും.ഈ ലിസ്റ്റില്‍ ഇനിയും ഉണ്ട് ആളുകള്‍.കോമഡിക്ക് പ്രാധാന്യം കൊടുത്തു,സ്ഥിരം അമേരിക്കന്‍ തമാശ ചിത്രങ്ങളുടെ ഫോര്‍മാറ്റില്‍ ഉണ്ടാക്കുന്ന ചിത്രങ്ങള്‍ ആവശ്യത്തിന് സെക്സ്,മയക്കുമരുന്ന് ഒക്കെ ചേര്‍ന്ന തമാശയുടെ ഒരു മിശ്രിതം ഉണ്ടാക്കി ആണ് അവതരിപ്പിക്കപ്പെടുന്നത്.പലപ്പോഴും സാധാരണ കഥാപാത്രങ്ങള്‍ ,അവരുടെ മണ്ടത്തരങ്ങള്‍ ഒക്കെ ആയി രസകരം ആണ് മിക്ക ചിത്രങ്ങളും.

  ഇനി The 40 Year Old Virgin ന്‍റെ കഥയിലേക്ക്.പേരില്‍ തന്നെ സിനിമയുടെ കഥ വ്യക്തമായി അവതരിപ്പിച്ചിട്ടുണ്ട്.40 വയസ്സായിട്ടും ഒരു സ്ത്രീയുടെ സാമീപ്യം അറിയാത്ത കഥാപാത്രം ആണ് ഈ ചിത്രത്തിലെ ആന്‍ഡി.അമേരിക്കന്‍ സാമൂഹിക ജീവിതത്തിലെ ഏറ്റവും വലിയ ദുരിതങ്ങളില്‍  ഒന്നായി മാറുന്നു ആന്‍ഡിയുടെ ജീവിതം.ആന്‍ഡി ജീവിതത്തില്‍ എല്ലാ നന്മകളും ഉള്ള മനുഷ്യന്‍ ആണ്.ഒരു ഇലക്ട്രോണിക്  സ്റ്റോറില്‍ അക്കൌണ്ടന്റ് ആയി ജോലി ചെയ്യുന്ന അയാളുടെ ജീവിതം സാധാരണയിലും സാധാരണം ആണ്.ഒരു കാര്‍ പോലും ഇല്ലാതെ സൈക്കിളില്‍ സഞ്ചരിക്കുന്ന വാരാന്ത്യം വീട്ടില്‍ ഇരുന്നു ഗെയിം കളിച്ചും കോമിക്സ് പുസ്തകങ്ങള്‍ വായിച്ചും ജീവിക്കുന്ന ആന്‍ഡി അമേരിക്കന്‍ ജീവിതത്തിലെ വൈചിത്ര്യങ്ങളില്‍ ഒന്നായി മാറുന്നു.

   എന്നാല്‍ ഒരു ദിവസം ലൈംഗിക ജീവിതത്തെക്കുറിച്ച് ഒപ്പം ജോലി ചെയ്യുന്ന ഡേവിഡ്,ജേ,കാള്‍ എന്നിവരോട് സംസാരിക്കുമ്പോള്‍ അവര്‍ ആന്‍ഡി എല്ലാവരിലും നിന്നും ഒളിപ്പിച്ചു വച്ച ആ രഹസ്യം അവര്‍ മനസ്സിലാക്കുന്നു.ആന്‍ഡി നാല്‍പ്പതാം വയസ്സിലും “കന്യകന്‍” ആണ്.സൗഹൃദം ഒന്നും ഇല്ലാതിരുന്ന അവര്‍ ആന്‍ഡിയെ സഹായിക്കാന്‍ തീരുമാനിക്കുന്നു.അവര്‍ തമ്മില്‍ ഒരു സൗഹൃദം ഉണ്ടാകുന്നു.അതിനു ഒപ്പം ആന്‍ഡിയ്ക്ക് ചേരുന്ന ഒരു സ്ത്രീയെ അന്വേഷിച്ചും ഉള്ള യാത്രയും.സുഹൃത്തുക്കള്‍ എന്ന നിലയില്‍ ഉള്ള അഭിപ്രായങ്ങളും അവരുടെ വാക്കുകള്‍ കേട്ട് ആന്‍ഡി ചെന്ന് എത്തുന്ന മണ്ടത്തരങ്ങള്‍ എല്ലാം കൂടി ചിത്രത്തെ രസകരം  ആക്കുന്നുണ്ട്‌.സാധാരണ കഥയും സ്റ്റീവ് കാരലിന്റെ രസകരമായ ആന്‍ഡിയും സുഹൃത്തുക്കളും എല്ലാം കൂടി ചിത്രത്തെ നല്ലൊരു Adult-Comedy ചിത്രമായി മാറ്റുന്നു.

More movie suggestions @www.movieholicviews.blogspot.com

563.IDENTITY THIEF(ENGLISH,2013),|Comedy|Crime|,Dir:-Seth Gordon,*ing:-Jason Bateman, Melissa McCarthy, John Cho.

    ഒരാളുടെ വ്യക്തി വിവരങ്ങള്‍ ചോര്‍ത്തി അയാളുടെ പേരില്‍ തട്ടിപ്പുകള്‍ നടത്തുന്ന സംഘങ്ങളെ കുറിച്ച് പലപ്പോഴും കേള്‍ക്കുന്നതാണ്.ലോകമെമ്പാടും നടക്കുന്ന സാധാരണയായ ഈ തട്ടിപ്പുകളില്‍ ഇരയാകുന്നവര്‍ക്ക് ധന നഷ്ടവും മാനഹാനിയും പലപ്പോഴും സംഭവിക്കുന്നു..ഇന്റര്‍നെറ്റ്‌,മറ്റു ആശയ വിനിമയ സങ്കേതങ്ങള്‍ വഴി ഒക്കെ നടക്കുന്ന ഈ തട്ടിപ്പുകള്‍  ദിവസം തോറും വളര്‍ന്നു വരുന്ന ടെക്നോളജികളെ പലപ്പോഴും അവയുടെ വിശ്വാസ്യതയില്‍ സംശയം ഉണ്ടാക്കാറും ഉണ്ട്.ഒരാള്‍ അയാളുടെ സ്വകാര്യ വിവരങ്ങള്‍ രേഖപ്പെടുത്തുന്ന ഏതു സ്ഥലത്തും കാത്തിരിക്കുന്ന ഒരു അപകടം.അതാണ്‌ Identity Thief  എന്ന ചിത്രത്തിന്‍റെ കഥ കോമഡി ആയി അവതരിപ്പിക്കുന്നത്‌.

  സാധാരണക്കാരന്‍  ആണ് സാന്‍ഡി പാറ്റെര്സന്‍ എന്ന അക്കൌണ്ടന്റ്.രണ്ടു പെണ്‍ക്കുട്ടികളും ഭാര്യയും ആയി ജീവിക്കുന്ന അയാളുടെ  ജീവിത സ്വപ്‌നങ്ങള്‍ നേടുവാന്‍ ആയി അയാള്‍ പരിശ്രമിക്കുന്നു.എന്നാല്‍ ഏതൊരു സാധാരണക്കാരനെ പോലെയും മാസ ശമ്പളത്തില്‍ ആശ്രയിക്കുന്ന അയാള്‍ രണ്ടു അറ്റവും കൂട്ടി മുട്ടിക്കാന്‍ ശ്രമിക്കുന്നു.ജീവനക്കാരുടെ ശമ്പളം ഒന്നും കൂട്ടാതെ സ്വന്തം ശമ്പളം കൂട്ടുന്ന മാനേജര്‍ ഒക്കെ അയാളുടെ ദുരിതം കൂട്ടുന്നു.എന്നാല്‍ ഒരു ദിവസം ബാങ്കില്‍ നിന്നും വന്നതാണെന്ന് പറഞ്ഞ ഒരു ഫോണ്‍ കോളില്‍ അയാളുടെ സ്വകാര്യമായ ചില വിവരങ്ങള്‍ ചോരുന്നു.അമേരിക്കയുടെ മറ്റൊരു  ഭാഗത്ത്‌ അയാളുടെ പേരില്‍ മറ്റൊരാള്‍ രൂപം കൊള്ളുകയായിരുന്നു.ക്രെഡിറ്റ് കാര്‍ഡില്‍ നിന്നും അയാള്‍ പോലും അറിയാതെ പണം പോകുന്നു.ചെയ്യാത്ത കുറ്റത്തിന് പോലീസ് കേസുകള്‍ ഉണ്ടാകുന്നു.പുതുതായി ലഭിച്ച സ്വപ്നതുല്യമായ ജോലിക്ക് പോലും ഭീഷണി ഉണ്ടാകുന്നു.

  സാന്‍ഡിയ്ക്ക് തന്‍റെ നിരപരാധിത്വം തെളിയിച്ചേ തീരൂ.അതിനു അയാള്‍ ഒരു യാത്ര തുടങ്ങുന്നു.അയാള്‍ തന്‍റെ വ്യക്തിത്വം മോഷ്ട്ടിച്ച ആളെ കണ്ടെത്താന്‍ ഉള്ള ശ്രമത്തില്‍ ആണ്.മെലിസ മക്കാര്‍ത്തി,ജേസന്‍ ബേറ്റ് മാന്‍ എന്നിവര്‍ ഒറിജിനലും അപര വ്യക്തിത്വവും ആയി അഭിനയിച്ച ചിത്രം ബോക്സോഫീസ് വിജയം നേടിയിരുന്നു ചെറിയ ബജറ്റില്‍ നിന്ന് കൊണ്ട്.കുറച്ചു തമാശകള്‍ ഒക്കെ ഉള്ള പ്രവചിക്കാവുന്ന ക്ലൈമാക്സും  ഉള്ള ഒരു സാധാരണ  കൊച്ചു ചിത്രം ആണ് Identity Thief.കുറച്ചു സ്നാക്സ് ഒക്കെ മുന്നില്‍ വച്ച്  കണ്ടു  കൊണ്ടിരിക്കാവുന്ന രസകരമായ ചിത്രം.

More movie suggestions @www.movieholicviews.blogspot.com